dubai traffic congestion worsens:ദുബൈ: രാജ്യത്ത് ​ഗതാ​ഗതക്കുരുക്ക് അതിരൂക്ഷമായിതന്നെ തുടരുന്നു. രാജ്യത്ത് വർദ്ധിച്ചവരുന്ന ജനസംഖ്യയും വാഹനപ്പെരുപ്പവുമാണ് ​ഗതാതക്കുരുക്കിന് കാരണമെന്നാണ് റിപ്പോർട്ടുകൾ ചൂണ്ടിക്കാട്ടുന്നത്. ദുബൈയിലെ യാത്രികർക്ക് ഈ വർഷം മാത്രം ഏകദേശം 45 മണിക്കൂർ വരെ ട്രാഫിക്കിൽ നഷ്ടമായതായാണ് റിപ്പോർട്ടുകൾ പറയുന്നത്. കഴിഞ്ഞ വർഷം ഇത് 35 മണിക്കൂറായിരുന്നു. ഒര വർഷം കൊണ്ട് 10 മണിക്കൂറാണ് ഇതിൽ വർദ്ധിച്ചിരിക്കുന്നത്. 

ഇൻ റിക്സ് (INRIX) പുറത്തുവിട്ട 2025-ലെ ​ഗ്ലോബൽ ട്രാഫിക് റിപ്പോർട്ട് പ്രകാരം യുഎഇയിലെ വിവിധ എമിറേറ്റുകളിലായി 8 മുതൽ 45 മണിക്കൂർ വരെയാണ് ട്രാഫിക്കിൽ ചിലവഴിക്കേണ്ടി വന്നത്. ദുബൈയിലെ താമസക്കാർക്ക് 45 മണിക്കൂർ നഷ്ടമായപ്പോൾ അബൂദബിയിലെ താമസക്കാർക്ക് 29 മണിക്കൂറും ഉമ്മുൽഖുവൈനിലെ താമസക്കാർക്ക് 28 മണിക്കൂറും അൽഐനിലെ താമസക്കാർക്ക് 17 മണിക്കൂറും ഫുജൈറയിലെ താമസക്കാർക്ക് 8 മണിക്കൂറുമാണ് ട്രാഫിക്കിൽ നഷ്ടമായത്. 

കഴിഞ്ഞ 5 വർഷത്തിനിടെ യുഎഇയിലെ ജനസംഖ്യയിൽ രണ്ട് ദശലക്ഷത്തിലധികം വർദ്ധനവാണുണ്ടായത്. ഈ വർഷം നവംബറോടെ ഇത് 11.48 ദശലക്ഷത്തിലെത്തിയിരുന്നു. ഈ ജനപ്പെരുപ്പവും ​ഗതാ​ഗതക്കുരുക്കിന് വലിയ തോതിൽ കാരണമാകുന്നുവെന്നാണ് റിപ്പോർട്ട് വ്യക്തമാക്കുന്നത്.

വർധിച്ചുവരുന്ന ഈ ഗതാഗത വെല്ലുവിളി നേരിടാൻ ദുബൈ, അബൂദബി ഉൾപ്പെടെയുള്ള എമിറേറ്റുകൾ കോടിക്കണക്കിന് ദിർഹമാണ് ചെലവഴിക്കുന്നത്. ഗതാഗതക്കുരുക്ക് പരമാവധി കുറയ്ക്കാനും മൊബിലിറ്റി വർദ്ധിപ്പിക്കാനും ലക്ഷ്യമിട്ടുള്ള വലിയൊരു പദ്ധതി യുഎഇ സർക്കാർ നവംബറിൽ പ്രഖ്യാപിച്ചിരുന്നു.

2030 ഓടെ നടപ്പാക്കാൻ ഉദ്ദേശിക്കുന്ന 170 ബില്യൺ ദിർഹമിന്റെ ദേശീയ ഗതാഗത, റോഡ് പദ്ധതികളുടെ പാക്കേജാണ് യുഎഇയുടെ ഊർജ്ജ, അടിസ്ഥാന സൗകര്യ മന്ത്രി സുഹൈൽ അൽ മസ്രൂയി യുഎഇ ഗവൺമെന്റ് വാർഷിക യോഗത്തിൽ പ്രഖ്യാപിച്ചത്. 

ഈ പദ്ധതികളിൽ, ഇത്തിഹാദ് റോഡിൽ ആറ് വരികൾ കൂടി കൂട്ടിച്ചേർത്ത് മൊത്തം 12 വരികളാക്കും. എമിറേറ്റ്‌സ് റോഡ് മുഴുവൻ ഭാഗവും 10 വരികളായി വികസിപ്പിച്ച് ശേഷി 65% വർദ്ധിപ്പിക്കുകയും യാത്രാ സമയം 45 ശതമാനം കുറയ്ക്കുകയും ചെയ്യും. ഷെയ്ഖ് മുഹമ്മദ് ബിൻ സായിദ് റോഡും 10 വരികളായി വികസിപ്പിച്ച് ശേഷി 45 ശതമാനം വർദ്ധിപ്പിക്കും. പ്രതിദിനം 360,000 യാത്രകൾ വഹിക്കാൻ ശേഷിയുള്ള, 120 കിലോമീറ്റർ നീളത്തിൽ 12 ലെയ്‌നുകളുള്ള ഒരു നാലാമത്തെ ഫെഡറൽ ഹൈവേയുടെ നിർമ്മാണ പഠനവും ഈ പദ്ധതിയുടെ ഭാഗമാണ്.

വർധിച്ചുവരുന്ന ഗതാഗതക്കുരുക്കിന്റെ ഫലമായി, ദുബൈയിലെ തിരക്കേറിയ സമയങ്ങളിലെ ശരാശരി വേഗത കുറഞ്ഞുവരികയാണ്. 2023-ലെ മണിക്കൂറിൽ 33 mph ആയിരുന്നത് 2025-ൽ 29 mph ആയി കുറഞ്ഞിട്ടുണ്ട്.

കഴിഞ്ഞ രണ്ട് പതിറ്റാണ്ടിനിടെ ദുബൈയിലെ ഗതാഗത അടിസ്ഥാന സൗകര്യങ്ങളിൽ 175 ബില്യൺ ദിർഹത്തിന്റെ നിക്ഷേപമാണ് ഉണ്ടായിട്ടുള്ളത്. ദുബൈ മെട്രോ, ദുബൈ ട്രാം, 25,000 ലെയിൻ കിലോമീറ്റർ റോഡുകൾ, 560 കിലോമീറ്റർ സൈക്ലിംഗ് ട്രാക്കുകൾ, 1,050 പാലങ്ങളും തുരങ്കങ്ങളും തുടങ്ങിയവ ഈ നിക്ഷേപത്തിന്റെ ഭാഗമാണ്. മക്കിൻസി & കമ്പനിയുടെ പഠനം അനുസരിച്ച്, റോഡ്‌സ് ആൻഡ് ട്രാൻസ്‌പോർട്ട് അതോറിറ്റിയുടെ (ആർ‌ടി‌എ) പദ്ധതികൾ കാരണം ഇന്ധനച്ചെലവിലും സമയച്ചെലവിലുമായി 319 ബില്യൺ ദിർഹം ലാഭിക്കാൻ സാധിച്ചു.

ലോകത്തെ തിരക്കേറിയ നഗരങ്ങളിൽ ഇസ്താംബുൾ മുന്നിൽ

ഇൻറിക്സ് 2025 ഗ്ലോബൽ ട്രാഫിക് സ്‌കോർകാർഡിൽ, തുർക്കിയിലെ ഇസ്താംബുളാണ് തുടർച്ചയായ രണ്ടാം വർഷവും ഏറ്റവും തിരക്കേറിയ നഗരങ്ങളുടെ പട്ടികയിൽ ഒന്നാമത്. ഇവിടെ യാത്രക്കാർക്ക് 118 മണിക്കൂറാണ് ഗതാഗതക്കുരുക്കിൽ നഷ്ടപ്പെട്ടത്. മെക്സിക്കോ സിറ്റി, ചിക്കാഗോ, ന്യൂയോർക്ക് സിറ്റി, ലണ്ടൻ, പാരീസ്, ലോസ് ഏഞ്ചൽസ് തുടങ്ങിയ നഗരങ്ങളും ഏറ്റവും തിരക്കേറിയവരുടെ പട്ടികയിൽ ഇടം നേടിയിട്ടുണ്ട്.

പുതിയ തൊഴിലവസരങ്ങൾ അറിയാൻ ചാനൽ ഇപ്പോൾ തന്നെ ഫോളോ ചെയ്യൂ https://chat.whatsapp.com/K00sdUQdhiK3O9yzfeF2zV

leading gcc entrepreneur;വെറും ഒരു ബാഗ് വസ്ത്രങ്ങളുമായി ദുബൈയിൽ എത്തി: ഇന്ന് ജിസിസിയിലെ പ്രമുഖ വ്യവസായി; തലമുറകൾ കണ്ട അമ്രത് ലാൽ 

leading gcc entrepreneur;ദുബൈ: 52 വർഷങ്ങൾക്ക് മുമ്പ് സ്വർണ്ണത്തിന് ഗ്രാമിന് വെറും 6 ദിർഹം മാത്രം വിലയുണ്ടായിരുന്ന കാലത്ത്, ഒരു ചെറിയ ബാഗ് വസ്ത്രങ്ങളും പാക്കറ്റ് ചിക്കൂ പഴവുമായി ദുബൈയിൽ കാലുകുത്തിയ ഒരു ഇന്ത്യൻ പ്രവാസിയുണ്ട് – അമ്രത് ലാൽ ത്രിഭോവൻ ദാസ്. 1973 ഡിസംബർ 13-ന് മുംബൈയിൽ നിന്ന് എയർ ഇന്ത്യ വിമാനത്തിൽ ദുബൈയിലെത്തിയ ഈ ഗുജറാത്ത് സ്വദേശി ഇന്ന് ഗൾഫ് മേഖലയിലെ പ്രമുഖ സ്വർണ്ണാഭരണ നിർമ്മാണ സ്ഥാപനത്തിന്റെ ഉടമയാണ്.

1,100 രൂപയുടെ വിമാന ടിക്കറ്റ്; അപ്രതീക്ഷിത തുടക്കം

1941-ൽ ഗുജറാത്തിലെ ഉന ഗ്രാമത്തിൽ ജനിച്ച അമ്രത് ലാൽ 1958-ൽ മുംബൈയിലേക്ക് താമസം മാറി, അവിടെ സ്വർണ്ണപ്പണിയിൽ പരിശീലനം നേടി. ഗൾഫിലെ സാധ്യതകളെക്കുറിച്ച് കേട്ടറിഞ്ഞ അദ്ദേഹം ദുബൈയിലേക്ക് പോകാൻ തീരുമാനിച്ചു. കപ്പലിൽ യാത്ര ചെയ്യേണ്ടിയിരുന്നെങ്കിലും, കപ്പലിന് തകരാറ് സംഭവിച്ചതോടെ 1,100 രൂപ മുടക്കി വിമാനത്തിൽ യാത്ര ചെയ്യേണ്ടിവന്നു. അക്കാലത്ത് അതൊരു വലിയ തുകയായിരുന്നു.

“ഞാൻ കപ്പലിൽ പോകേണ്ടതായിരുന്നു. പക്ഷേ കപ്പൽ അപകടത്തിൽപ്പെട്ടു. വിസയുടെ കാലാവധി അവസാനിക്കാറായതിനാൽ വിമാനത്തിൽ പോകുകയല്ലാതെ എനിക്ക് മറ്റ് മാർഗമില്ലായിരുന്നു,” അമ്രത് ലാൽ ആ പഴയ യാത്ര ഓർത്തെടുത്തു.

അമ്രത് ലാൽ ദുബൈയിൽ എത്തുമ്പോൾ ഇന്നത്തേത് പോലെ തിരക്കേറിയ മഹാനഗരമായിരുന്നില്ല ഇവിടം. ദുബൈ ക്രീക്കിന്റെ തീരത്തായിരുന്നു സ്വർണ്ണക്കടകൾ. കൈകൊണ്ട് തുഴയുന്ന അബ്രയ്ക്ക് വെറും 10 ഫിൽസ് ആയിരുന്നു യാത്രാക്കൂലി.

ബർ ദുബൈയിൽ ഏകദേശം പത്ത് സ്വർണ്ണക്കടകളും ദെയ്റയിൽ അതിലും കുറച്ച് കടകളും മാത്രമേ ഉണ്ടായിരുന്നുള്ളൂ. വൈദ്യുതി ലഭിച്ചിരുന്നത് ഒരു തെരുവിൽ മൂന്ന് മണിക്കൂർ മാത്രമാണ്, അത് അടുത്ത തെരുവിലേക്ക് മാറിമാറി പോയിരുന്നു. വൈദ്യുതി വരുമ്പോൾ ഞങ്ങൾ ജോലി ചെയ്യുകയും വൈദ്യുതി പോകുമ്പോൾ വിശ്രമിക്കുകയും ചെയ്യുമായിരുന്നു,” അദ്ദേഹം പഴയകാലത്തെ ദുരിതങ്ങൾ അനുസ്മരിച്ചു

ഷാർജയിലെ വഴിത്തിരിവ്: യോഗേഷ് ജ്വല്ലേഴ്സ്

ദുബൈയിൽ ഷോപ്പ് തുടങ്ങാനുള്ള ശ്രമം പരാജയപ്പെട്ടപ്പോൾ അമ്രത് ലാൽ ഷാർജയിലേക്ക് മാറി. 1970-കളുടെ മധ്യത്തിൽ താമസസ്ഥലത്തുനിന്ന് തന്നെ സ്വർണ്ണപ്പണിക്കാരനായി അദ്ദേഹം ജോലി തുടങ്ങി. 1976-ൽ പുതിയ നിയമങ്ങൾ വന്നതോടെ ട്രേഡ് ലൈസൻസിന് അപേക്ഷിക്കാമെന്നായി. ഇതോടെ ഒരു ബന്ധുവിൻ്റെ നിക്ഷേപം കൂടി ചേർത്ത് അവർ വീട്ടിൽ നിന്ന് ഒരു ചെറിയ ഷോപ്പ് ആരംഭിച്ചു.

1980 ആയപ്പോഴേക്കും ഷാർജയിൽ അദ്ദേഹം തൻ്റെ ആദ്യ കടയായ യോഗേഷ് ജ്വല്ലേഴ്‌സ് തുറന്നു. പിന്നീട് കൂടുതൽ കടകൾ തുറന്നെങ്കിലും, അദ്ദേഹം ശ്രദ്ധ പൂർണ്ണമായും തൻ്റെ വൈദഗ്ധ്യം നിലനിന്നിരുന്ന സ്വർണ്ണാഭരണ നിർമ്മാണത്തിലേക്ക് മാറ്റി.

വൈറൽ’ ആയ ആദ്യ വളയുടെ ഡിസൈൻ

ഇറ്റാലിയൻ ശൈലിയിൽ കൈകൊണ്ട് നിർമ്മിച്ച ആദ്യത്തെ വളയാണ് അദ്ദേഹത്തിന്റെ പ്രിയപ്പെട്ട ഓർമ്മകളിലൊന്ന്. “ആദ്യത്തെ ഒരു മാസത്തേക്ക് ആരും അതിനെക്കുറിച്ച് അറിഞ്ഞിരുന്നില്ല. എന്നാൽ രണ്ട് മാസത്തിന് ശേഷം അത് വൈറൽ ആയി. എല്ലാവരും ആ ഡിസൈൻ വാങ്ങാൻ ആഗ്രഹിച്ചു,” അദ്ദേഹം പറഞ്ഞു. ഈ ഡിസൈൻ അദ്ദേഹത്തിന് യുഎഇയിലെ സ്വർണ്ണ സമൂഹത്തിൽ വിശ്വസ്തനായ കരകൗശല വിദഗ്ധൻ എന്ന പദവി നേടിക്കൊടുത്തു.

ഒമ്പത് തലമുറകളുടെ പാരമ്പര്യം

അമ്രത് ലാൽ സ്വർണ്ണപ്പണിക്കാരുടെ എട്ടാം തലമുറയെയാണ് പ്രതിനിധീകരിക്കുന്നത്. അദ്ദേഹത്തിന്റെ മകനും ചെറുമകനും ഇന്ന് ഈ പാരമ്പര്യം തുടരുന്നു. 1975-ൽ അദ്ദേഹത്തിൻ്റെ കുടുംബം യുഎഇയിൽ എത്തിച്ചേർന്നു, അന്ന് റെസിഡൻസി വിസയ്ക്ക് വെറും 10 ദിർഹം മാത്രമായിരുന്നു വില. ഇന്ന്, അമ്രത് ലാലിന്റെ സ്ഥാപനം പ്രതിമാസം ഏകദേശം 150 കിലോ സ്വർണ്ണാഭരണങ്ങൾ ഉത്പാദിപ്പിക്കുകയും ജിസിസിയിലുടനീളമുള്ള ക്ലയന്റുകൾക്ക് വിതരണം ചെയ്യുകയും ചെയ്യുന്നു. 85 തൊഴിലാളികളാണ് ഇപ്പോൾ അദ്ദേഹത്തിൻ്റെ യൂണിറ്റിൽ ജോലി ചെയ്യുന്നത്.

“ദുബൈയിൽ വന്നപ്പോൾ എൻ്റെ ആദ്യത്തെ സ്വപ്നം ഒരു റാഡോ വാച്ച് വാങ്ങുക എന്നതായിരുന്നു,” അമ്രത് ലാൽ പറഞ്ഞു. ആറ് വർഷമെടുത്തു അദ്ദേഹത്തിന്റെ ആ സ്വപ്നം സഫലമാവാൻ

Qatar cruise destination : ക്രൂയിസുകൾക്ക് പ്രിയപ്പെട്ട ഇടമായി ഖത്തർ ; ക്രൂയിസ് ഡെസ്റ്റിനേഷൻ ഓഫ് ദി ഇയർ അവാർഡ് ഖത്തറിന്

Qatar cruise destination : ലണ്ടൻ: 2025 വേവ് അവാർഡിൽ ഖത്തർ ‘ക്രൂയിസ് ഡെസ്റ്റിനേഷൻ ഓഫ് ദി ഇയർ’ പുരസ്കാരം നേടി. യുകെയിലെ പ്രമുഖ ക്രൂയിസ്-യാത്രാ അവാർഡ് പരിപാടിയായ വേവ് അവാർഡുകളുടെ ചടങ്ങ് നവംബർ 26-ന് ലണ്ടനിൽ നടന്നു.

വേൾഡ് ഓഫ് ക്രൂയിസിംഗ് മാസികയുടെ വായനക്കാരുടെ വോട്ടെടുപ്പിന്റെ അടിസ്ഥാനത്തിലാണ് ഖത്തർ ഈ പുരസ്കാരം കരസ്ഥമാക്കിയത്. നോർവേ, ബാർബഡോസ്, ഗ്രീസ്, അലാസ്ക, അന്റാർട്ടിക്ക, കാനറി ദ്വീപുകൾ എന്നിവയ്‌ക്കൊപ്പം ഷോർട്ട്‌ലിസ്റ്റിലുണ്ടായിരുന്ന ഏഴ് ലക്ഷ്യസ്ഥാനങ്ങളിൽ ഖത്തർ മുന്നിലെത്തി.

ഖത്തർ ടൂറിസത്തിലെ ടൂറിസം വികസന മേധാവി ഒമർ അബ്ദുൽറഹ്മാൻ അൽ ജാബർ പ്രതികരിക്കവെ പറഞ്ഞു:
“ഈ അവാർഡ് ഖത്തറിന്റെ വളരുന്ന ക്രൂയിസ് ടൂറിസം ശക്തിയെ തെളിയിക്കുന്നു. മികച്ച അടിസ്ഥാന സൗകര്യങ്ങളും സാംസ്കാരിക-സമുദ്ര അനുഭവങ്ങളും ഖത്തറിനെ അന്താരാഷ്ട്ര ക്രൂയിസ് മാപ്പിലെ പ്രധാന കേന്ദ്രമാക്കി.”

അതേസമയം, ദോഹ ഓൾഡ് പോർട്ടിലെ ക്രൂയിസ് ടെർമിനലിലേക്ക് എം‌എസ്‌സി യൂറിബിയ എത്തിയതോടെ 2025/2026 പുതിയ ക്രൂയിസ് സീസൺ ഖത്തർ ആരംഭിച്ചതായി അധികൃതർ അറിയിച്ചു. നവംബർ മുതൽ മെയ് വരെ നീളുന്ന സീസണിൽ 72 ക്രൂയിസ് കപ്പലുകൾ ഖത്തറിലെത്തും, അതിൽ 40 ഹ്രസ്വ സ്റ്റോപ്പുകളും 15 റൗണ്ട് ട്രിപ്പുകളും 3 കന്നി യാത്രകളും ഉൾപ്പെടുന്നു