Dubai Police Arrest Six-Member Gangദുബൈ: വ്യാജ ഓൺലൈൻ ഷോപ്പിങ് വെബ്സൈറ്റ് ഉപയോഗിച്ച് ഉപഭോക്താക്കളുടെ ബാങ്ക് കാർഡ് വിവരങ്ങൾ ചോർത്തി പണം തട്ടിയ ആറംഗ സംഘത്തെ ദുബൈ പൊലീസ് അറസ്റ്റ് ചെയ്തു. ‘അപ്രതീക്ഷിത പണം പിൻവലിക്കൽ’ (Unexpected Deduction) എന്ന പേരിൽ തിരിച്ചറിഞ്ഞ സംഘത്തിനെതിരെ നിരവധി പരാതികൾ ലഭിച്ചതിനെ തുടർന്നാണ് നടപടി.
വ്യാജ ഓൺലൈൻ ഷോപ്പിങ് വെബ്സൈറ്റ് സൃഷ്ടിച്ച് അതിലൂടെ ഉപഭോക്താക്കളുടെ ബാങ്ക് കാർഡ് വിവരങ്ങൾ ശേഖരിക്കുകയായിരുന്നു സംഘത്തിന്റെ രീതി. ഈ വിവരങ്ങൾ ഉപയോഗിച്ച് ഉടമകളുടെ അനുമതിയില്ലാതെ പണം ചെലവഴിക്കുകയും ഡിജിറ്റൽ വാലറ്റുകളിലേക്ക് തുക മാറ്റുകയും ചെയ്തതായി പൊലീസ് അറിയിച്ചു.
മോഷ്ടിച്ച പണം സ്വീകരിക്കുന്നതിനായി സംഘം പ്രത്യേകമായി ബാങ്ക് അക്കൗണ്ടുകളും ഡിജിറ്റൽ വാലറ്റുകളും തുറന്നിരുന്നു. ചിലരുടെ കാർഡ് വിവരങ്ങൾ മറ്റ് തട്ടിപ്പുകാർക്ക് വിൽക്കുകയും ചെയ്തതായി അന്വേഷണത്തിൽ കണ്ടെത്തി.
അക്കൗണ്ടുകളിൽനിന്ന് അറിയാത്ത ഇടപാടുകളിലൂടെ പണം നഷ്ടപ്പെട്ടതായി നിരവധി പേർ പൊലീസിൽ പരാതി നൽകിയിരുന്നു. ഇതിൽ ഒരു സ്വകാര്യ കമ്പനിയിലെ ജീവനക്കാരിയായ യുവതിയുടെ പരാതിയും ഉൾപ്പെടുന്നു. വർഷങ്ങളായി ശമ്പളത്തിൽനിന്ന് സമ്പാദിച്ച പണം അക്കൗണ്ടിൽനിന്ന് നഷ്ടപ്പെട്ടതായി യുവതി അറിയിച്ചു. ഉറക്കത്തിലായിരുന്ന സമയത്താണ് പണം പിൻവലിക്കപ്പെട്ടതെന്നും അവർ വ്യക്തമാക്കി.
പരാതികളുടെ അടിസ്ഥാനത്തിൽ ദുബൈ പൊലീസിലെ ജനറൽ ഡിപ്പാർട്ട്മെന്റ് ഓഫ് ക്രിമിനൽ ഇൻവെസ്റ്റിഗേഷൻ പ്രത്യേക അന്വേഷണസംഘത്തെ നിയോഗിച്ചു. നിരീക്ഷണത്തിലൂടെയും അന്വേഷണത്തിലൂടെയും ആറുപേരെയും തിരിച്ചറിഞ്ഞ പൊലീസ് സംഘം ഇവർ താമസിച്ചിരുന്ന സ്ഥലത്ത് നടത്തിയ റെയ്ഡിലാണ് അറസ്റ്റ് ചെയ്തത്.
പ്രതികളിൽനിന്ന് ഇരകളുടെ ബാങ്ക് കാർഡുകളും തട്ടിപ്പിന് ഉപയോഗിച്ചതായി കരുതുന്ന ചെക്ക് ബുക്കുകളും പിടിച്ചെടുത്തു. മോഷ്ടിച്ച കാർഡ് വിവരങ്ങൾ മറ്റ് തട്ടിപ്പുകാർക്ക് കൈമാറാനായിരുന്നു സംഘത്തിന്റെ പദ്ധതിയെന്നും പൊലീസ് വ്യക്തമാക്കി.
ഓൺലൈൻ ഇടപാടുകൾ നടത്തുമ്പോൾ വെബ്സൈറ്റുകളുടെ വിശ്വാസ്യത ഉറപ്പാക്കണമെന്നും അപരിചിതരുമായി ബാങ്ക് കാർഡ് വിവരങ്ങളോ മറ്റ് സാമ്പത്തിക വിവരങ്ങളോ പങ്കുവെക്കരുതെന്നും ദുബൈ പൊലീസ് പൊതുജനങ്ങൾക്ക് മുന്നറിയിപ്പ് നൽകി. അക്കൗണ്ടുകളിൽ സംശയാസ്പദമായ ഇടപാടുകൾ ശ്രദ്ധയിൽപ്പെട്ടാൽ 901 എന്ന നമ്പറിലോ പൊലീസ് ഐ (Police Eye) സേവനം വഴിയോ ദുബൈ പൊലീസ് ആപ്പിലെ ഇ-ക്രൈം സംവിധാനത്തിലൂടെയോ പരാതി നൽകാം.
