Sharjah Digitises Procedures for Electricity Restoration ഷാർജ: തീപിടിത്തത്തിൽ നാശനഷ്ടമുണ്ടായ വീടുകളിലും സ്ഥാപനങ്ങളിലും വൈദ്യുതി പുനഃസ്ഥാപിക്കുന്നതിനുള്ള നടപടികൾ കൂടുതൽ ലളിതമാക്കി ഷാർജ. ഇതിനാവശ്യമായ നോ ഒബ്ജക്ഷൻ സർട്ടിഫിക്കറ്റ് (NOC) ഇനി ഓൺലൈനായി ലഭ്യമാക്കുന്നതിനുള്ള സംവിധാനം ഷാർജ സിവിൽ ഡിഫൻസ് അതോറിറ്റി ആരംഭിച്ചു. ഷാർജ ഇലക്ട്രിസിറ്റി, വാട്ടർ ആൻഡ് ഗ്യാസ് അതോറിറ്റിയുമായി (SEWA) സഹകരിച്ചാണ് പുതിയ ഡിജിറ്റൽ സേവനം നടപ്പാക്കുന്നത്.
പുതിയ സംവിധാനത്തിലൂടെ തീപിടിത്തത്തിൽ നാശനഷ്ടമുണ്ടായ വീടുകളുടെയും സ്ഥാപനങ്ങളുടെയും ഉടമകൾക്ക് സർട്ടിഫിക്കറ്റിനായി സർക്കാർ ഓഫീസുകൾ നേരിട്ട് സന്ദർശിക്കേണ്ടതില്ല. അപേക്ഷയുമായി ബന്ധപ്പെട്ട വിവരങ്ങളും സർട്ടിഫിക്കറ്റും രണ്ട് വകുപ്പുകൾക്കുമിടയിൽ ഇലക്ട്രോണിക് സംവിധാനത്തിലൂടെ കൈമാറും. ഇതോടെ രേഖകൾ നേരിട്ട് കൊണ്ടുപോകുന്നതിനും അപേക്ഷയുടെ പുരോഗതി അന്വേഷിച്ച് ഓഫീസുകൾ കയറിയിറങ്ങുന്നതിനുമുള്ള ബുദ്ധിമുട്ട് ഒഴിവാകും.
തീപിടിത്തത്തെത്തുടർന്ന് വൈദ്യുതി വിച്ഛേദിക്കപ്പെട്ട താമസവീടുകളിൽ വൈദ്യുതി പുനഃസ്ഥാപിക്കുന്നതിനുള്ള അപേക്ഷകൾക്ക് ഫീസ് ഈടാക്കില്ലെന്നും അധികൃതർ വ്യക്തമാക്കി. എന്നാൽ അംഗീകൃത സുരക്ഷാ മാനദണ്ഡങ്ങളും സാങ്കേതിക നിബന്ധനകളും പാലിച്ചശേഷം മാത്രമേ വൈദ്യുതി പുനഃസ്ഥാപിക്കുകയുള്ളൂ.
മൂന്ന് മിനിറ്റിനുള്ളിൽ അനുശോചന ടെന്റ് അനുമതി
അനുശോചന ടെന്റുകൾ സ്ഥാപിക്കുന്നതിനുള്ള അനുമതി ലഭ്യമാക്കുന്നതിനുള്ള നടപടികളും ഷാർജ ഡിജിറ്റലാക്കി. ഷാർജ ഡിജിറ്റൽ ആപ്പ് വഴിയോ സിവിൽ ഡിഫൻസ് അതോറിറ്റിയുടെ ഓൺലൈൻ പ്ലാറ്റ്‌ഫോം വഴിയോ അപേക്ഷ സമർപ്പിക്കാം. അപേക്ഷ നൽകിയാൽ മൂന്ന് മിനിറ്റിനുള്ളിൽ നോ ഒബ്ജക്ഷൻ സർട്ടിഫിക്കറ്റ് ലഭ്യമാക്കാനാണ് സംവിധാനം.
സർട്ടിഫിക്കറ്റ് ലഭിച്ചാലുടൻ അപേക്ഷയുടെ വിവരങ്ങൾ വൈദ്യുതി കണക്ഷൻ നടപടികൾക്കായി SEWA-യിലേക്ക് സ്വമേധയാ കൈമാറും. ഇതിനായി SEWA-യിൽ പ്രത്യേകം അപേക്ഷ നൽകുകയോ രേഖകൾ നേരിട്ട് എത്തിക്കുകയോ വേണ്ടതില്ല.
ഷാർജ സിവിൽ ഡിഫൻസ് അതോറിറ്റി ഡയറക്ടർ ജനറൽ മേജർ ജനറൽ യൂസുഫ് ഒബൈദ് ഹർമൂൽ അൽ ഷംസി പുതിയ സേവനങ്ങൾ ജനങ്ങളുടെ ബുദ്ധിമുട്ടുകൾ കുറയ്ക്കാനും സർക്കാർ സേവനങ്ങൾ കൂടുതൽ വേഗത്തിലാക്കാനും ലക്ഷ്യമിട്ടുള്ളതാണെന്ന് അറിയിച്ചു.
സർക്കാർ വകുപ്പുകൾ തമ്മിലുള്ള ഡിജിറ്റൽ ഏകോപനം ശക്തമാക്കുന്നതിലൂടെ അപേക്ഷാ നടപടികളിലെ ആവർത്തനവും അനാവശ്യ ഓഫീസ് സന്ദർശനങ്ങളും ഒഴിവാക്കാനാകുമെന്ന് അധികൃതർ വ്യക്തമാക്കി.
