Dubai Global Village Offers Free Entry ആദ്യ 3,100 സന്ദർശകർക്ക് മാത്രം സൗജന്യ പ്രവേശനം; ദീപാവലി ആഘോഷങ്ങളുടെ ഭാഗമായി പ്രത്യേക ആനുകൂല്യം
ദുബായ്: ദുബായ് ഗ്ലോബൽ വില്ലേജിൽ നവംബർ 7 ശനിയാഴ്ച സന്ദർശകർക്ക് സൗജന്യ പ്രവേശനം അനുവദിക്കുന്നു. നവംബർ 6 വെള്ളിയാഴ്ച ഗ്ലോബൽ വില്ലേജ് സന്ദർശിച്ച് പ്രവേശന ടിക്കറ്റ് എടുക്കുന്നവർക്ക് അടുത്ത ദിവസവും സൗജന്യമായി പ്രവേശിക്കാനുള്ള അവസരമാണ് ഒരുക്കിയിരിക്കുന്നത്. ദീപാവലി ആഘോഷങ്ങളുടെ ഭാഗമായി പ്രഖ്യാപിച്ച പ്രത്യേക ഓഫറാണിത്.
നവംബർ 7ന് ആദ്യമെത്തുന്ന 3,100 സന്ദർശകർക്കാണ് ഈ ആനുകൂല്യം ലഭിക്കുക. ഇതിനായി നവംബർ 6ലെ പ്രവേശന ടിക്കറ്റ് ഗ്ലോബൽ വില്ലേജിലെ ‘ഗേറ്റ് ഓഫ് ദി വേൾഡ്’ പ്രവേശന കവാടത്തിന് പുറത്തുള്ള ഇൻഫർമേഷൻ ഡെസ്കിൽ നൽകി സൗജന്യ പ്രവേശന ടിക്കറ്റ് കൈപ്പറ്റണം. ആദ്യം എത്തുന്നവർക്ക് മുൻഗണന എന്ന അടിസ്ഥാനത്തിലാണ് ആനുകൂല്യം ലഭിക്കുക.
ദീപാവലി ആഘോഷങ്ങൾ നവംബർ 6 മുതൽ 10 വരെ
ഗ്ലോബൽ വില്ലേജിൽ നവംബർ 6 മുതൽ 10 വരെയാണ് ദീപാവലി ആഘോഷങ്ങൾ സംഘടിപ്പിക്കുന്നത്. ഇന്ത്യ പവിലിയനുമായി സഹകരിച്ച് ദീപാവലി മേളയും ഒരുക്കിയിട്ടുണ്ട്. പരമ്പരാഗത അലങ്കാരങ്ങൾ, സമ്മാനങ്ങൾ, മധുരപലഹാരങ്ങൾ, ഇന്ത്യൻ ഭക്ഷണവിഭവങ്ങൾ എന്നിവ മേളയുടെ ഭാഗമായി ലഭിക്കും.
കുട്ടികൾക്കായി പ്രത്യേക പരിപാടികളും ഒരുക്കിയിട്ടുണ്ട്. മുഖത്ത് ചിത്രങ്ങൾ വരയ്ക്കൽ, ദീപം അലങ്കരിക്കൽ, രംഗോലി ഒരുക്കൽ തുടങ്ങിയ പ്രവർത്തനങ്ങൾ കുട്ടികളുടെ കോർണറിൽ ഉണ്ടായിരിക്കും.
നവംബർ 6ന് രാത്രി എട്ട് മുതൽ ഒമ്പത് വരെ പ്രധാന വേദിയിൽ പ്രത്യേക ബൈഠക് സംഗീത പരിപാടിയും നടക്കും. നവംബർ 8ന് രാത്രി എട്ടിന് 700 ഡ്രോണുകൾ അണിനിരക്കുന്ന ദീപാവലി പ്രമേയത്തിലുള്ള ആകാശപ്രദർശനവും ഒരുക്കിയിട്ടുണ്ട്.
ഗ്ലോബൽ വില്ലേജിന്റെ സാധാരണ പ്രവേശന ടിക്കറ്റിൽ തന്നെ ദീപാവലി ആഘോഷങ്ങളിലെ പരിപാടികൾ ആസ്വദിക്കാനാകും. എന്നാൽ പ്രത്യേക റൈഡുകൾക്കും ചില വിനോദ ആകർഷണങ്ങൾക്കും അധിക നിരക്ക് ബാധകമായിരിക്കും.
