Sharjah–Dubai Travel to Get Faster ഷാർജ: ഷാർജയെയും ദുബായിയെയും ബന്ധിപ്പിക്കുന്ന പുതിയ റോഡ് ശൃംഖലകളും മേൽപ്പാലങ്ങളും ഗതാഗതത്തിനായി തുറന്നുകൊടുത്തു. ഇരു എമിറേറ്റുകൾക്കുമിടയിലെ ഗതാഗതക്കുരുക്ക് കുറയ്ക്കുന്നതിനും യാത്രാസമയം ലാഭിക്കുന്നതിനുമായി നടപ്പാക്കുന്ന 750 മില്യൺ ദിർഹത്തിന്റെ വൻ അടിസ്ഥാനസൗകര്യ വികസന പദ്ധതിയുടെ ആദ്യഘട്ടമാണ് തുറന്നത്. ഷാർജ ഭരണാധികാരിയും യുഎഇ സുപ്രീം കൗൺസിൽ അംഗവുമായ ഷെയ്ഖ് ഡോ. സുൽത്താൻ ബിൻ മുഹമ്മദ് അൽ ഖാസിമിയാണ് പദ്ധതിയുടെ ആദ്യഘട്ടം ഉദ്ഘാടനം ചെയ്തത്.

ഷാർജ എക്സ്പോ സെന്ററിൽ 45-ാമത് രാജ്യാന്തര പുസ്തകമേള ആരംഭിക്കുന്ന സാഹചര്യത്തിലാണ് പുതിയ റോഡുകൾ ഭാഗികമായി ഗതാഗതത്തിനായി തുറന്നത്. നവംബർ 4 മുതൽ 15 വരെ നടക്കുന്ന പുസ്തകമേളയിലേക്ക് എത്തുന്ന സന്ദർശകർക്ക് കൂടുതൽ സുഗമമായ യാത്ര ഉറപ്പാക്കുകയാണ് ഇതിലൂടെ ലക്ഷ്യമിടുന്നത്.

അൽ താവൂൻ ഇന്റർചേഞ്ച് ഭാഗികമായി തുറന്നു

പദ്ധതിയുടെ ആദ്യഘട്ടത്തിൽ അൽ താവൂൻ ഇന്റർചേഞ്ചിന്റെ ഭാഗികമായ തുറന്നുകൊടുക്കലും പുതിയ പാലങ്ങളുടെയും കവലകളുടെയും പ്രവർത്തനവുമാണ് ഉൾപ്പെടുത്തിയിരിക്കുന്നത്. പുതിയ ഗതാഗത ക്രമീകരണമനുസരിച്ച് ഷെയ്ഖ് മുഹമ്മദ് ബിൻ സായിദ് റോഡിൽനിന്ന് എക്സ്പോ സെന്റർ ഷാർജയിലേക്ക് ഏകദിശയിൽ വാഹനങ്ങൾക്ക് സഞ്ചരിക്കാം.

അൽ താവൂൻ മേഖലയിലെ ഗതാഗതക്കുരുക്ക് കുറയ്ക്കുന്നതിനും ദുബായിൽനിന്ന് ഷാർജയിലേക്കും തിരിച്ചുമുള്ള യാത്ര കൂടുതൽ സുഗമമാക്കുന്നതിനും പുതിയ റോഡ് ശൃംഖല സഹായിക്കും.

560 മീറ്റർ നീളത്തിൽ തുരങ്കം

പദ്ധതിയുടെ പ്രധാന ഭാഗമായ അൽ താവൂൻ തുരങ്കത്തിന് 560 മീറ്റർ നീളമുണ്ടാകും. ഇരുവശങ്ങളിലേക്കും മൂന്ന് വരികൾ വീതമുള്ള തുരങ്കത്തിലൂടെ തിരക്കേറിയ സമയങ്ങളിൽ മണിക്കൂറിൽ ഏകദേശം 4,200 വാഹനങ്ങൾക്ക് കടന്നുപോകാൻ സാധിക്കും.

തുരങ്കം പൂർണമായി തുറക്കുന്നതോടെ പ്രധാന റോഡുകളിലെ വാഹനങ്ങൾക്കും പ്രാദേശിക ഗതാഗതത്തിനുമിടയിലെ തടസ്സങ്ങൾ കുറയും. ഇതുവഴി വാഹനങ്ങളുടെ കാത്തിരിപ്പ് സമയം 85 ശതമാനം വരെ കുറയുമെന്നാണ് പ്രതീക്ഷ.

2027 ഫെബ്രുവരിയോടെ പദ്ധതി പൂർത്തിയാകും

750 മില്യൺ ദിർഹം ചെലവിൽ നടപ്പാക്കുന്ന പദ്ധതിയിൽ അഞ്ച് പ്രധാന ഭാഗങ്ങളാണുള്ളത്. അൽ താവൂൻ റൗണ്ട്എബൗട്ട്, അൽ ഖാൻ സ്ട്രീറ്റ്, അൽ ഖുലഫ അൽ റാഷിദീൻ ഇന്റർചേഞ്ച്, വ്യാവസായിക മേഖലകളിലെ റോഡുകൾ, ഷെയ്ഖ് മുഹമ്മദ് ബിൻ സായിദ് റോഡുമായുള്ള ബന്ധിപ്പിക്കൽ എന്നിവയുടെ വികസനവും ഇതിൽ ഉൾപ്പെടുന്നു.

പദ്ധതി പൂർണമായി പ്രവർത്തനസജ്ജമാകുന്നതോടെ ഷാർജയിലെ താമസ, വാണിജ്യ, വ്യവസായ മേഖലകളിൽനിന്ന് ദുബായിലേക്കുള്ള യാത്ര കൂടുതൽ എളുപ്പമാകും. ദിനംപ്രതി ഇരു എമിറേറ്റുകൾക്കുമിടയിൽ യാത്ര ചെയ്യുന്ന ആയിരക്കണക്കിന് തൊഴിലാളികൾക്കും താമസക്കാർക്കും പുതിയ റോഡുകൾ വലിയ ആശ്വാസമാകും. 2027 ഫെബ്രുവരിയോടെ പദ്ധതിയുടെ മുഴുവൻ പ്രവർത്തനങ്ങളും പൂർത്തിയാക്കാനാണ് ലക്ഷ്യമിടുന്നത്.