Kuwait Delivery Motorcycle Traffic Violations കുവൈത്ത് സിറ്റി: റോഡ് സുരക്ഷ ഉറപ്പാക്കുന്നതിനും അപകടസാധ്യത സൃഷ്ടിക്കുന്ന നിയമലംഘനങ്ങൾ തടയുന്നതിനുമായി ഡെലിവറി മോട്ടോർ സൈക്കിൾ യാത്രക്കാർക്കെതിരായ പരിശോധന ശക്തമാക്കി കുവൈത്ത് ആഭ്യന്തര മന്ത്രാലയം. ജനറൽ ട്രാഫിക് ഡിപ്പാർട്ട്‌മെന്റിന്റെ നേതൃത്വത്തിലാണ് രാജ്യത്തിന്റെ വിവിധ ഭാഗങ്ങളിൽ പരിശോധനാ ക്യാമ്പയിനുകൾ തുടരുന്നത്.
ട്രാഫിക് നിയമങ്ങൾ പാലിക്കാതെ വാഹനമോടിക്കുന്ന ഡെലിവറി ബൈക്ക് യാത്രക്കാരെ കണ്ടെത്തി നിയമനടപടി സ്വീകരിക്കുകയാണ് പരിശോധനയുടെ ലക്ഷ്യം. റോഡിന്റെ വലതുവശം ചേർന്ന് യാത്ര ചെയ്യാതിരിക്കുക, അനുവദിച്ചിട്ടില്ലാത്ത സ്ഥലങ്ങളിൽ വാഹനം നിർത്തുക, റോഡിലെ വരകളും അടയാളങ്ങളും അവഗണിക്കുക, ട്രാഫിക് സിഗ്നലുകൾ പാലിക്കാതിരിക്കുക തുടങ്ങിയ നിയമലംഘനങ്ങളാണ് പ്രധാനമായും പരിശോധിക്കുന്നത്.
രാജ്യത്തിന്റെ വിവിധ മേഖലകളിൽ പരിശോധന തുടരുമെന്ന് ആഭ്യന്തര മന്ത്രാലയം അറിയിച്ചു. റോഡുകളിലെ അച്ചടക്കം ഉറപ്പാക്കുന്നതിനും അപകടസാധ്യത കുറയ്ക്കുന്നതിനുമുള്ള നടപടികളുടെ ഭാഗമായാണ് ക്യാമ്പയിൻ.
ഡെലിവറി കമ്പനികൾ തങ്ങളുടെ ജീവനക്കാരുടെ പ്രവർത്തനങ്ങൾ കൃത്യമായി നിരീക്ഷിക്കണമെന്നും ട്രാഫിക് നിയമങ്ങൾ പാലിക്കുന്നുണ്ടെന്ന് ഉറപ്പാക്കണമെന്നും മന്ത്രാലയം നിർദേശിച്ചു.
ഡെലിവറി ബൈക്ക് യാത്രക്കാർ സുരക്ഷാ ഹെൽമറ്റ് നിർബന്ധമായും ധരിക്കണം, വേഗപരിധി പാലിക്കണം, മറ്റ് റോഡ് നിയമങ്ങൾ അനുസരിച്ച് മാത്രം വാഹനമോടിക്കണം. സ്വന്തം സുരക്ഷയ്ക്കൊപ്പം മറ്റ് റോഡ് ഉപയോക്താക്കളുടെ സുരക്ഷയും ഉറപ്പാക്കണമെന്നും മന്ത്രാലയം ഓർമിപ്പിച്ചു.
