Kuwait Dive Team Warns of Dangerous Sea Conditions കുവൈത്ത് സിറ്റി: വരാനിരിക്കുന്ന അൽ അഹൈമർ (Al-Ahaimer) നക്ഷത്രകാലത്തോടനുബന്ധിച്ച് കടലിൽ ശക്തമായ കാലാവസ്ഥാ വ്യതിയാനങ്ങൾ ഉണ്ടാകാൻ സാധ്യതയുള്ളതിനാൽ ബോട്ട് ഉടമകൾക്കും കപ്പൽ ജീവനക്കാർക്കും കടൽയാത്രക്കാർക്കും കുവൈത്ത് ഡൈവ് ടീം ജാഗ്രതാ നിർദേശം നൽകി. ഔദ്യോഗിക അധികൃതർ കാലാവസ്ഥ സുരക്ഷിതമാണെന്ന് സ്ഥിരീകരിക്കാത്ത പക്ഷം രാത്രികാല കടൽയാത്ര ഒഴിവാക്കണമെന്നും സംഘം നിർദേശിച്ചു.

പരിസ്ഥിതി സന്നദ്ധ സംഘടനയുടെ കീഴിൽ പ്രവർത്തിക്കുന്ന കുവൈത്ത് ഡൈവ് ടീമിന്റെ തലവൻ വലീദ് അൽ ഫാദിലാണ് കുവൈത്ത് വാർത്താ ഏജൻസിയായ കുനയോട് ഇക്കാര്യം വ്യക്തമാക്കിയത്. അൽ അഹൈമർ കാലം ഗൾഫ് മേഖലയിലും അറബിക്കടലിലും പെട്ടെന്നുള്ളതും ശക്തവുമായ കാലാവസ്ഥാ മാറ്റങ്ങൾക്ക് കാരണമാകുമെന്ന് അദ്ദേഹം പറഞ്ഞു.

സാധാരണയായി നവംബർ മധ്യത്തോടെ ആരംഭിക്കുന്ന അൽ അഹൈമർ കാലം 40 മുതൽ 45 ദിവസം വരെ നീണ്ടുനിൽക്കും. ശരത്കാലത്തുനിന്ന് ശൈത്യകാലത്തിലേക്കുള്ള മാറ്റത്തിനിടെ വടക്കുപടിഞ്ഞാറൻ, പടിഞ്ഞാറൻ കാറ്റുകൾ ശക്തമാകാൻ സാധ്യതയുണ്ട്. ചില സാഹചര്യങ്ങളിൽ മണിക്കൂറിൽ 80 മുതൽ 120 കിലോമീറ്റർ വരെ കാറ്റിന്റെ വേഗം ഉയരാം.

ശക്തമായ കാറ്റിനൊപ്പം കടൽ പ്രക്ഷുബ്ധമാകുകയും തിരമാലകൾ ഉയരുകയും ചെയ്യുന്നത് ചെറുവള്ളങ്ങൾക്കും മത്സ്യബന്ധന ബോട്ടുകൾക്കും ഭീഷണിയാകും. ബോട്ടുകൾ മറിയുന്നതിനും കപ്പലുകൾ അപകടത്തിൽപ്പെടുന്നതിനും സാധ്യതയുണ്ടെന്നും അദ്ദേഹം മുന്നറിയിപ്പ് നൽകി.

രാത്രിയിൽ കാഴ്ചപരിധി കുറയുന്നതും പെട്ടെന്നുള്ള കാലാവസ്ഥാ മാറ്റങ്ങളെ നേരിടാൻ ബുദ്ധിമുട്ടുണ്ടാകുന്നതും അപകടസാധ്യത വർധിപ്പിക്കും. അതിനാൽ രാത്രികാല കടൽയാത്ര ഒഴിവാക്കണമെന്ന് ഡൈവ് ടീം ആവശ്യപ്പെട്ടു. റാസ് അൽ അർദ്, റാസ് അൽ ജുലൈഅ, റാസ് അൽ സൂർ തുടങ്ങിയ ശക്തമായ കടൽച്ചുഴികളും ഒഴുക്കുകളും അനുഭവപ്പെടുന്ന മേഖലകളിൽ പ്രത്യേക ജാഗ്രത പാലിക്കണമെന്നും നിർദേശമുണ്ട്.

ബോട്ടുകളിൽ സുരക്ഷാ സംവിധാനങ്ങൾ ഉറപ്പാക്കണം

കടലിൽ പോകുന്നതിന് മുമ്പ് ബോട്ടുകളിലെ സുരക്ഷാ, രക്ഷാപ്രവർത്തന ഉപകരണങ്ങൾ പ്രവർത്തനക്ഷമമാണെന്ന് ഉറപ്പാക്കണം. ട്രാക്കിങ്, ആശയവിനിമയ സംവിധാനങ്ങൾ പ്രവർത്തിപ്പിക്കുകയും കാലാവസ്ഥാ വകുപ്പിന്റെ മുന്നറിയിപ്പുകളും ബുള്ളറ്റിനുകളും പരിശോധിക്കുകയും വേണം.

വേനൽക്കാലത്തിന് ശേഷം മത്സ്യലഭ്യത വർധിക്കുന്നതിനാൽ ഈ കാലയളവിൽ മത്സ്യത്തൊഴിലാളികൾ കടലിൽ പോകാൻ താൽപര്യം കാണിക്കാറുണ്ട്. എന്നാൽ അൽ അഹൈമർ കാലത്ത് കുവൈത്തിൽ മുൻകാലങ്ങളിലും സമീപകാലത്തും നിരവധി കപ്പൽ അപകടങ്ങളും മുങ്ങൽ സംഭവങ്ങളും ഉണ്ടായിട്ടുണ്ടെന്ന് വലീദ് അൽ ഫാദിൽ ഓർമിപ്പിച്ചു. കടൽയാത്രക്കാരുടെ ജീവനും സ്വത്തിനും സുരക്ഷ ഉറപ്പാക്കാൻ ഔദ്യോഗിക നിർദേശങ്ങൾ കർശനമായി പാലിക്കണമെന്നും അദ്ദേഹം ആവശ്യപ്പെട്ടു.